Fjölmargir eru jafnan á ferðinni við tónlistar- og ráðstefnuhúsið Hörpu og ferðamenn þar fremstir í flokki. Fuglar sjást einnig á sveimi, hundar, kettir og mýs. Minkar eru hins vegar sjaldséðari en einn slíkur var á ferðinni þarna í gær, þegar blaðamaður og ljósmyndari Morgunblaðsins var þar á ferðinni.
Skaust hann yfir planið og fram hjá listaverkinu Himinglævu eftir Elínu Hansdóttur. Ekki liggur ljóst fyrir hvaðan minkurinn kom en líklegt má telja að undirheimar Reykjavíkur séu hans heimkynni.