Bláa lónið lokað fram yfir helgi
Setja bókamerki
Lögreglan á Suðurnesjum mun funda með Bláa lóninu seinnipartinn á mánudaginn og fara yfir stöðu mála í tengslum við eldgosið í Sundhnúkagígum.
„Menn eru að velta fyrir sér möguleikum hvað starfsemina varðar,“ segir Úlfar Lúðvíksson, lögreglustjóri á Suðurnesjum, aðspurður.
Ljóst er að þessi vinsæli ferðamannastaður verður því lokaður fram yfir helgi. Um síðustu helgi framlengdi lónið lokun staðarins þangað til í dag.
Fyrr í vikunni sagðist framkvæmdastjóri hjá Bláa lóninu reikna með því að safnstæði fyrir rútur yrði staðsett skammt frá lóninu þegar það verður opnað. Bláa lónið hefur áður gripið til svipaðra ráða þegar opnað hefur verið eftir eldsumbrot. Sú breyting sem hefur þó orðið er að um 350 bílastæði við Bláa lónið eru komin undir hraun, ásamt rútustæðum.
Rafmagn líklega á Svartsengislínu í dag
Úlfar kveðst jafnframt gera ráð fyrir því að rafmagn verði komið á Svartsengislínu í dag, samkvæmt upplýsingum sem lögreglan hefur fengið frá Landsneti. Starfsmenn Landsnets hafa staðið í ströngu síðustu daga við að koma upp nýju rafmagnsmastri innan varnargarðsins við Svartsengi. Það verkefni á að klárast í dag, segir Úlfar.
Áfram er opið í inn í Grindavík í gegnum Nesveg og Suðurstrandarveg. Enginn má þó fara inn í Svartsengi nema að eiga þangað erindi. Þar er mikil umferð þungavinnuvéla þar sem unnið er við hækkun varnargarða, segir Úlfar, sem gerir þó ekki ráð fyrir því að unnið verði þar á morgun eða hinn.
Gist var í 43 húsum í Grindavík í nótt.
Yfir 100 manns að störfum hjá Vísi
Sjávarútvegsfyrirtækið Vísir er með svo til fulla starfsemi í bænum. Þar hafa verið rúmlega 100 manns að störfum á hverjum degi. Vinna liggur þar niður yfir helgina en í vikunni var landað úr tveimur togurum.
Úlfar segir starf viðbragðsaðila vera tiltölulega rólegt í augnablikinu í tengslum við eldgosið. Áfram gýs úr einum gíg og virðist eldgosið vera stöðugt. „Það er í sjálfu sér ekki mikill vandræðagangur í kringum það,“ segir Úlfar, sem bætir við að fáir ferðamenn hafi komið til Grindavíkur síðustu daga.
„Við erum ekkert að eltast við fólk sem labbar í átt að eldgosinu fyrir utan lokunarpósta en þetta hefur ekki verið vandamál,“ segir hann, spurður út í ferðamennina.
Bláa lónið lokað fram yfir helgi
„Hún er jafnvel fegurri en áður“
Björgunarsveitir í startholunum á kjördag
29 þúsund bílar bættust í flotann
Teknir með kókaín í nokkru magni
Gular viðvaranir í gildi
