Jarðskjálfti upp á 5,5 á Richter á Norðurlandi

Tveir jarðskjálftar urðu úti fyrir Norðurlandi rétt fyrir klukkan 16 í dag. Seinni skjálftinn var upp á 5,5 á Richter og varð hans vart víða á Norðurlandi. Jarðskjálftans varð m.a. vart á Húsavík, Grímsey og á Akureyri og að sögn Ragnars Stefánssonar, jarðskjálftafræðings á Veðurstofunni, eru upptök skjálftans um 20 kílómetra austsuðaustur af Grímsey.

Mikill fjöldi eftirskjálfta hefur fylgt í kjölfarið og eru þrír þeirra yfir 3 stig á Richter.

Magnús Þór Bjarnarson, íbúi í Grímsey, segist hafa orðið greinilega var við stærsta skjálftann. „Þetta var eins og högg og ég heyrði drururnar. Þetta væri eins og það væri keyrt á húsið,“ segir Magnús. Hann segist aðeins hafa orðið var við stærsta skjálftann en ekki hina skjálftana. Hann sagðist ekki ætla að skjálftinn væri það sterkur að neinn hefði slasast.

• Blogga um frétt