Mannanafnanefnd hefur hafnað því að mannsnafnið Christofer sé tekið á mannanafnaskrá en tekið beiðni um nafnið Christopher til greina. Þá hefur nefndin einnig samþykkt beiðni um nafnið Daniel.
Fram kemur í fundargerð nefndarinnar að eiginnafnið Christofer teljist ekki ritað í samræmi við almennar ritreglur íslensks máls og ekki sé hefð fyrir þessum rithætti nafnsins því að samkvæmt upplýsingum frá Hagstofu Íslands beri enginn íslenskur ríkisborgari nafnið þannig ritað. Eiginnafnið Christofer teljist því ekki uppfylla tilvitnað ákvæði laga um mannanöfn.
Þá segir nefndin, að eiginnafnið Christopher teljist ekki ritað í samræmi við almennar ritreglur íslensks máls en hefð sé fyrir þessum rithætti því að samkvæmt upplýsingum frá Hagstofu Íslands beri 19 íslenskir ríkisborgarar sem eigi eða hafi átt lögheimili á Íslandi, nafnið Christopher að fyrsta eða öðru nafni. Eiginnafnið Christopher taki íslenska eignarfallsendingu (Christophers) og telst uppfylla ákvæði laga um mannanöfn.
Nefndin segir að eiginnafnið Daniel teljist ekki ritað í samræmi við almennar ritreglur íslensks máls en hefð sé fyrir þessum rithætti því að samkvæmt upplýsingum frá Hagstofu Íslands beri nú 41 íslenskur ríkisborgari sem eigi eða hafi átt lögheimili á Íslandi, nafnið Daniel að fyrsta eða öðru nafni. Eiginnafnið Daniel taki íslenska eignarfallsendingu (Daniels) og teljist uppfylla ákvæði mannanafnalaga.