Senda inn efni
Konur geta orðið þungaðar fram eftir öllum aldri. mbl.is
Konur ekki ófrjóar eins snemma og þær halda
Læknum í Bretlandi þykir nú ástæða til þess a minna á að konur geti eignast börn fram eftir öllum aldri. Sérfræðingar óttast að eldri konur láti getnaðarvarnir róa þar sem þær telji víst að þær séu komnar úr barneign.
Talsmenn bresku fjölskyldustofnunnarinnar (FPA) telja að skilaboð til kvenna um að þær verði að eignast börn áður en þær ná ákveðnum aldri hafi „gengið of langt" og séu misvísandi. Staðreyndin sé sú að þrátt fyrir að dragi úr frjósemi með aldrinum geti konur hæglega orðið óléttar á fertugs,- fimmtugs,- og jafnvel sextugsaldri.
„Þótt skilaboðin um að frjósemi minnki með aldrinum séu mikilvæg þá er of mikið gert úr þeim á sama tíma og mikið er gert úr ótímabærri þungun unglinga. Þetta sendir misvísandi skilaboð til kvenna og samfélagsins um að það séu aðeins ungar konur sem verði óléttar og leiðir til þess að eldri konur trúa því gjarnan að þær séu orðnar ófrjóar löngu áður en sú er raunin," segir Julie Bentley, framkvæmdastjóri FPA.
Í Bretlandi sýnir tölfræðin að tíðni fóstureyðinga er jafnhá í aldurshópnum milli 40 til 44 ára og hjá stúlkum undir 16 ára aldri, eða 4 af hverjum 1.000. Margar þeirra eldri kvenna sem verða óléttar fara í fóstureyðingu vegna þess að í ljós kemur að eitthvað er að fóstrinu, líkt og algengt er með eldri mæður. Að sögn FPA hefur það hinsvegar sýnt sig að inn á milli eru líka margar eldri konur sem fara í fóstureyðingu vegna þess að þær ætla sér ekki að eignast fleiri börn, en hættu samt að nota getnaðarvarnir því þær gerðu ráð fyrir því að þær væru orðnar of gamlar til að verða óléttar.
Því hefur verið hrint af stað herferð í Bretlandi þar sem konur eru hvattar til að halda áfram að nota getnaðarvarnir fram yfir tíðarhvörf vilji þær ekki verða óléttar.
Til baka