Knattspyrnufélag Austfjarða og Selfoss mætast í úrslitaleiknum í neðrideildabikar karla í fótbolta á Laugardalsvellinum næsta föstudagskvöld, 27. september.
KFA og Selfoss, sem léku bæði í 2. deild í ár, unnu undanúrslitaleiki keppninnar í gær þegar KFA vann 4. deildarmeistara Tindastóls, 2:1, á Reyðarfirði og Selfoss vann heimasigur á 3. deildarliði Árbæjar, 4:1.
Gonzalo Zamorano skoraði tvö marka Selfyssinga gegn Árbæ og hefur þar með skorað 25 mörk í deild og bikarkeppnum fyrir lið Selfoss sem vann öruggan sigur í 2. deildinni. Alexander Clive Vokes og Aron Fannar Birgisson skoruðu hin tvö mörkin en Ragnar Páll Sigurðsson gerði mark Árbæinga og minnkaði þá muninn í 3:1 skömmu fyrir leikslok.
Tindastóll komst yfir í Fjarðabyggðarhöllinni á Reyðarfirði þegar þjálfari Skagfirðinga, Dominic Furness, skoraði strax á 4. mínútu.
Eiður Orri Ragnarsson jafnaði fyrir Austfirðinga sex mínútum síðar og Marteinn Már Sverrisson skoraði sigurmark þeirra um miðjan síðari hálfleik.
Bikarkeppnin fer fram í annað skipti í ár en þar taka þátt lið úr 2., 3. og 4. deild. Víðir úr Garði vann KFG úr Garðabæ í fyrsta úrslitaleik hennar á Laugardalsvellinum síðasta haust.