Senda inn efni
Allan Borgvardt fagnar marki með FH-ingum. mbl.is
Borgvardt færir sig um set í Noregi
Danski knattspyrnumaðurinn Allan Borgvardt, sem lék með Íslandsmeisturum FH fyrir nokkrum árum við góðan orðstír, skrifaði í dag undir tveggja ára samning við norska 1. deildarliðið Sandnes Ulf. Þar með er ljóst að Daninn knái snýr ekki aftur í íslenska fótboltann en FH-ingar hafa undanfarin ár reynt að fá hann til liðs við sig á nýjan leik.
Borgvardt hefur leikið með Bryne í norsku 1. deildinni frá árinu 2006 en hann fékk sig lausan undan samningum við Bryne í gær en félagið glímir við mikinn fjárhagsvanda.
Forráðamenn Sandnes Ulf voru fljótir til og buðu Borgvardt samning sem hann ákvað að taka en Sandnes Ulf vann sig upp í 1. deildina í haust.
Borgvardt lék með FH í þrjú tímabil, 2003-2005 og skoraði 34 mörk í 53 leikjum liðsins í deildinni og í bikarkeppninni. Hann var valinn besti leikmaður Íslandsmótsins í tvígang á lokahófi KSÍ.
Til baka