Brynjar Ingi Bjarnason skoraði og Viðar Ari Jónsson lagði upp mark í 5:0-sigri HamKam á Lillestrøm í norsku úrvalsdeildinni í dag.
Viðar Ari gaf stoðsendingu á Vegard Kongsro í fyrsta marki HamKam. Á 25. mínútu leiksins þurfti Viðar að fara af velli vegna meiðsla.
Brynjar Ingi kom inn á af varamannabekknum á 70. mínútu í stöðunni 4:0 og skoraði síðan fimmta mark HamKam. Góður dagur hjá Brynjari sem er KA-maður en félagar hans á Akureyri urðu bikarmeistarar í dag.
Sigurinn þýðir að HamKam er í áttunda sæti með 28 stig.
Íslenski landsliðsmaðurinn Logi Tómasson spilaði allan leikinn með Strømsgodset í 2:1-sigri liðsins á Sarpsborg í norsku úrvalsdeildinni í dag. Logi fékk hæstu einkunnir hjá a.mk. tveimur netmiðlum fyrir frammistöðu sína en hann bjargaði m.a. á marklínu undir lokin.
Sveinn Aron Guðjohnsen var í byrjunarliðinu hjá Sarpsborg og spilaði fyrstu 74 mínútur leiksins.
Úrslitin þýða að Strømsgodset er í níunda sæti með 27 stig en Sarpsborg er í 10. sæti með 26 stig.