Þrotabú Samsonar gæti tekið fimm ár

Það gæti tekið allt að fimm ár að ljúka skiptum á þrotabúi Samsonar vegna stærðar og umfangs þrotabúsins og vegna eðlis eignanna, að sögn Helga Birgissonar skiptastjóra.

Lýstar kröfur í þrotabúið hafa lækkað og eru í dag um áttatíu milljarðar króna. Þýski bankinn Commerzbank og suðurafríski bankinn Standard eiga kröfur samtals upp á 52,2 milljarða króna.

Eignir þrotabúsins sem eru fastar í hendi eru hins vegar aðeins um 2,3 milljarðar. Þessi upphæð gæti þó hækkað því Samson er með kröfulýsingu í þrotabú Landsbankans í Lúxemborg, á hlutdeild í vogunarsjóði, eignarhlut í Novator Properties og eignarhlut í hafnarverkefni í Pétursborg í Rússlandi, auk fleiri eigna. Þrotabú Samsonar á einnig stóra kröfu á Eimskip og verður hluthafi í hinu nýstofnaða hlutafélagi um starfsemi Eimskips.