Laugavegur verður lokaður fyrir umferð milli Frakkastígs og Bankastrætis. Rax / Ragnar Axelsson

Laugavegurinn frá Frakkastíg og Bankastræti verður göngugata eftir hádegi laugardaginn 5. september og vonast er til þess að ökumenn geymi bifreiðar sínar ókeypis í bílahúsunum á meðan.

"Við viljum gefa fótgangandi meira rými og afslappaðra andrúmsloft til að njóta verslunar og menningarlífs á Laugaveginum," er haft eftir Þorbjörgu Helgu Vigfúsdóttur borgarfulltrúa úi tilkynningu frá borginni og að taki borgarbúar strikið á Laugaveginn á morgun „muni þeir upplifa bæði skemmtilega verslanir og lifandi tónlist þar að auki.“

Lokun Pósthússtrætis á góðviðrisdögum þykir hafa heppnast vel í sumar en það er eitt af Grænu skrefunum í Reykjavík. Skapaðist þá oft góð stemning gangandi á Austurvelli, segir í tilkynningunni og umhverfis- og samgönguráð ákveðið í kjölfarið að gera tilraun með að loka Laugaveginum í samráði við kaupmenn og íbúa.

Fram kemur að tvær kannanir voru gerðar á vegum Umhverfis- og samgöngusviðs á Laugaveginum af þessu tilefni og kom þá meðal annars í ljós að 70-80% vegfarenda ganga götuna en aðeins rúmlega 20% keyra. Einnig kom í ljós að tæplega helmingur ökumanna á raunverulegt erindi á Laugaveginn, aðrir keyra flestir í gegn.

Lokað verður um klukkan 13.00 á morgun og síðar um daginn mun tónlist hljóma um götur. Gestir og gangandi geta búist við að heyra í Hjálmum, Ragnheiði Gröndal & Guðmundi Péturssyni, DÓRI DNA, Halla töframanni HELMUT und DALLA , Davíð Þór Jónsyni og Helga Svavari Svavarssyni. Kvennakórarnir Vox Feminae , Cantabile og Stúlknakór Reykjavíkur verða ennfremur á göngugötunni. Þau verða ýmist á Lækjartorgi, Skólavörðustíg og Laugvegi.