Landmannalaugar mbl.is/RAX

Lang fjölmennasta ferðakaupstefna sem haldin hefur hér á landi verður sett í Ráðhúsi Reykjavíkur kl. 19 í kvöld. Forseti borgarstjórnar setur kaupstefnuna Mid-Atlantic 2010 en hún er haldin á vegum Icelandair í Laugardalshöllinni. Kaupstefnunni lýkur á sunnudag.

Ferðakaupstefnan er nú haldin í 18. sinn. Tilgangurinn er að tengja saman kaupendur og seljendur ferðaþjónustu til að viðhalda og auka ferðamannastraum til Íslands, samkvæmt tilkynningu frá Icelandair, og er talin vera árlegur lykilviðburður í ferðaþjónustunni.

„Fulltrúar á Mid-Atlantic eru nú um 500 alls frá 14 löndum. Að þessu sinni koma mun fleiri fulltrúar erlendis frá en undanfarin ár, eða um 350. Þar af er von á um 150 kaupendum ferðaþjónustu frá Bandaríkjunum og Kanada, sem sýnir óvenju mikinn áhuga.

Hingað til lands eru komnir fulltrúar frá þeim löndum sem hafa mikil ferðaþjónustutengsl við Ísland í Evrópu og Norður-Ameríku. Þátttakendur eru fulltrúar ferðaskrifstofa, hótela, bílaleiga, skemmtigarða og margvíslegra annarra ferðaþjónustufyrirtækja og að auki taka þátt ferðamálaráð á norðurlöndum og ferðamálaráð þeirra svæða og borga sem Icelandair flýgur til í Norður-Ameríku.

„Nú er mikilvægi ferðaþjónustunnar fyrir íslenskt samfélag að aukast mjög og þess vegna er áríðandi fyrir okkur að halda ótrauð áfram og grípa þau viðskiptatækifæri sem eru undirstaðan í ferðþjónustunni. Aukinn áhugi erlendis frá er þess vegna mjög ánægjulegur. Þetta er einn helsti vettvangur fyrir íslenska ferðaþjónustu að selja og kynna sína vöru beint fyrir kaupendum.

En einnig eru hér t.d.bandarísk fyrirtæki að kaupa ferðaþjónustu frá Norður-Evrópu sem þeir síðan selja neytendum vestra og öfugt. Ísland er miðpunkturinn í öllu þessu starfi, líkt og í leiðarkerfi okkar, en á kaupstefnunni eru kynningarfundir, sölusýningar, stuttar ferðir og þemakvöld,“ segir Helgi Már Björgvinsson, framkvæmdastjóri sölu- og markaðssviðs Icelandair,“ að því er fram kemur í fréttatilkynningu.