Ástralska fyrirsætan Erin McNaught birti bikiní-mynd af sér á Instagram einum mánuði eftir að hún eignaðist barn. Á myndinni má sjá hvernig McNaught var komin með flatan maga og tónaða magavöðva stuttu eftir barnsburð. Myndin kom miklum umræðum af stað.
Fyrir neðan myndina greindi McNaught frá því hvernig hún hefði komist aftur í form á örskotstíma eftir barnsburð. Hún kvaðst hafa gengið mikið, borðað hollt og gert fjölbreyttar magaæfingar. McNaught fékk ótal athugasemdir við myndina. Margir kölluðu hana athyglissjúka og sögðu hana vera með minnimáttarkennd.
Eins og áður sagði kom myndbirting McNaught umræðum af stað. Fólk velti því fyrir sér hvernig þetta væri hægt. Einhverjir komu henni þá til varnar og sögðu að fólk væri hreinlega afbrýðisamt.
Samskonar myndir gefa konum óraunverulegar hugmyndir
En McNaught er ekki eina fræga konan sem hefur flaggað lögulegum líkama sínum stuttu eftir barnsburð. Kim Kardashian og Miranda Kerr eru dæmi um frægar konur sem hafa vakið athygli fyrir að skjótast aftur í fyrra form á nokkrum vikum eftir að hafa eignast barn.
Sálfræðingurinn og ráðgjafinn Natasha Bijlani segir að frægar konur gefi öðrum konum oft óraunhæfar hugmyndir um hvað sé eðlilegt.
„Þetta setur óþarfa álag á nýbakaðar þreyttar mæður. Þetta er ekki eitthvað sem nýjar mæður ættu að hafa áhyggjur af. Þær ættu frekar að verja tíma með barninu og jafna sig eftir fæðinguna. Þær ættu að ná tengslum við barnið í staðinn fyrir að hugsa um útlitið og líkamann,“ sagði Bijlani. „Það tekur níu mánuði að búa til barnið og móðirin ætti þá að gefa sér að minnsta kosti þann tíma til að jafna sig.“