„Ég ákvað að reyna við Peppa Pig fyrir 4 ára afmæli Línu. Það þarf mikinn sykur og meira af þolinmæði,“ segir Bjarni Benediktsson fjármálaráðherra á Facebook-síðu sinni en hann bakaði glæsilega köku fyrir yngstu dóttur sína sem fagnaði fjögurra ára afmæli sínu í vikunni. Þetta er ekki í fyrsta skipti sem Bjarni tekur sig til og massar baksturinn því í fyrra skreytti hann Línu Langsokk köku fyrir dóttur sína.
Í fyrra spurði ég Þóru Margréti Baldvinsdóttur út í kökubakstur eiginmanns hennar. Hún sagði að Bjarna væri ýmislegt til lista lagt:
„Bjarni, eins og svo margir aðrir auðvitað, á sér margar hliðar. Hann er mjög listrænn og sérstaklega flinkur að leira. Þannig að sykurmassinn hentaði. Þetta er ekki í fyrsta skipti sem hann græjar afmælisköku fyrir börnin. En þessi var sú allra flottasta,“ segir Þóra Margrét Baldvinsdóttir, eiginkona Bjarna.
Dóttir þeirra, Guðríður Lína, varð fjögurra ára um helgina og því tók faðir hennar sig til og skreytti afmæliskökuna. Um hefðbundna súkkulaðiköku var að ræða en svo skreytti hann kökuna með sykurmassa. Þóra segir að hann hafi fengið ákaflega góðar leiðbeiningar hjá kökufyrirtækinu Allt í köku áður en hann hófst handa. Þegar hún er spurð að því hvernig það kom til að hann hafi gert kökuna segir hún að hann sé einfaldlega hæfari.
„Hann er miklu flinkari en ég í því. Hann hefur gert nokkrar mjög flottar, Hello Kitty og fleiri í gegnum tíðina,“ segir Þóra Margrét.