Bandaríski tískubloggarinn Simone Mariposa er orðin þreytt á því að heyra hverju hún eigi að klæðast og hverju ekki vegna líkamsvaxtar síns. Hún ákvað því á dögunum að byrja með myllumerkið #WeWearWhatWeWant á Twitter til þess að hvetja konur í öllum stærðum að klæðast því sem þær vilja og auka sjálfstraust þeirra.
Viðbrögðin létu ekki á sér standa og hafa konur hvaðanæva verið duglegar að birta af sér myndir á Twitter með myllumerkinu.
Samkvæmt vef Cosmopolitan var upphafið að öllu frásagnir fólks sem klæðir sig svo það þóknist skoðunum annarra. Mariposa fékk nóg og ákvað að byrja með myllumerkið. „Ég hef sjálf fundið mikið fyrir þessu. Ég var hætt að vera berleggja og með berar hendur og hræddist föt sem sýndu magann,“ sagði Mariposa.
Nú hefur hún hætt að hlusta á þessar raddir og klæðist því sem að henni þóknast. Hún vonar að myllumerkið leiði til breytinga á því hvernig horft er á konur í yfirstærð.