Kjóllinn gerður úr ljósleiðurum

„Björk hafði samband við mig í byrjun hausts og bað mig um að vinna með sér. Ég hannaði nokkrar flíkur fyrir hana sem mér finnst afskaplega mikill heiður. Ég vann einnig með James Merry aðstoðarmanni Bjarkar en hann gerir fallegu grímurnar hennar,“ segir Hildur Yeoman fatahönnuður en hún á heiðurinn af fatnaði Bjarkar á tónleikunum sem hún hélt í Royal Albert Hall í fyrradag. Eftir tónleikana hefur Björk fengið fantagóð viðbrögð frá erlendu pressunni. 

Frétt af mbl.is: Björk fær 5 stjörnu dóma 

„Ljósakjóllinn var upprunalega gerður fyrir danssýninguna Og himinninn kristallast. Sem var á vegum Íslenska dansflokksins og Siggu Soffíu. Hann er innblásinn frá sjávardýrum en hann er gerður úr ljósleiðurum og gengur fyrir rafmagni,“ segir Hildur. 

Hildur er í skýjunum með tónleika Bjarkar. Hún segir að þetta hafi verið mikil upplifun. 

„Tónleikarnir sjálfir voru dásamlegir, flottustu tónleikar sem ég hef farið á. Ég hef aldrei séð svona mikil viðbrögð hjá áhorfendum áður. Þegar þeir voru að klappa hana upp og syngja lögin hennar til þess að fá hana aftur upp á svið. Björk á endalaust hrós skilið fyrir fallegan flutning og verkin sem hún flutti,“ segir hún. 

Högni Daníelsson Yeoman og Hildur Yeoman. mbl.is/Freyja Gylfa

Kjóll eftir Hildi Yeoman.

• Blogga um frétt