Lét skera gat í kinnarnar á sér

Fólk leggur ýmislegt á sig fyrir fegurðina, eins og að gangast undir vafasamar skurðaðgerðir.

Förðunarbloggarinn AJ Weir lét skera göt í kinnarnar á sér vegna þess að hún öfundaði 11 ára soninn af spékoppunum. Læknir gerði því gat í kinnar Weir, og saumaði aftur saman, til þess að búa til spékoppana sem hún þráði. Aðgerðin tók 90 mínútur.

Ekki voru þó allir hrifnir af uppátækinu, því eiginmaður og vinir Weir töldu hana hafa gengið af göflunum.

„Mig hefur lengi langað í spékoppa. Ég er vön að stinga fingrum mínum í spékoppa fólks, það er reglulega skrýtið en ég bara elska þá. Ég tengi þá við að vera sætur og krúttlegur,“ sagði Weir í samtali við Daily Mail.

„Ég vissi að þetta var áhættusamt. Stundum er  spékoppurinn þar til að byrja með, en hverfur svo með tímanum. Sumum finnst þetta vera reglulega heimskuleg aðgerð.“