Haustlína Gucci var frumsýnd í Mílanó í gær. Línan fékk hjörtu til að slá hraðar og raunar örvaði hún allar stöðvarnar í heilanum (ef svo má segja). Það er að segja allar þær brautir sem hafa með fegurðarskyn og smekk að gera.
Glaðir litir eru áberandi og munstur. Við eigum að vera óhrædd við að vera alla vegana til fara ef marka má þessa línu. Klæðaburður hinnar hefðbundnu íslensku konu fengi líklega falleinkunn hjá tískuhönnuðum Gucci því varla var svarta flík að finna á sýningunni.
Ef við getum lært eitthvað af þessari tískulínu þá er það það að klæða okkur í samlit föt og alls ekki í stíl. Því brjálaðra því betra. Munstraðar buxur á móti munstruðum jakka og þar fram eftir götunum. Það sem skiptir líka máli er að vera óhræddar við að blanda saman ólíkum efnum og litum. Og svo er Gucci-mónogrammið ákaflega vinsælt. Það er ekki bara í töskum og prentað á efni heldur líka prentað á nælon-sokkana. Það er eitthvað.
Með þessari línu er Gucci að sýna á sér aðra hlið. Gucci minnir heimsbyggðina óneitanlega á árin fyrir hrun þegar allar ríku konurnar (og karlarnir) voru merktar mónógramminu frá toppi til táar. Allar alvöru guggur áttu alla vega eina Gucci-tösku og helst skó í stíl. Nú á hins vegar ekkert að vera í stíl. Nú má leika sér og njóta lífsins í lit – ekki svarthvítu eins og þótti töff fyrir hrun.
Eins og sjá má af öllum myndunum hér fyrir neðan sýnir línan býsna breiðan skala – sem er svo dásamlegt eitthvað og fagurt!