Fatahönnuðurinn Vivienne Westwood ráðlagði fólki að þvo sér ekki of oft þegar hún var spurð út í unglegt útlit sitt á tískuvikunni í París en fatahönnuðurinn er 76 ára.
The Guardian greinir frá því að eiginmaður hennar, Andreas Kronthaler, sem er 51 árs hafi bætt því við að hún færi bara í bað einu sinni í viku. Það þykir þó bara nokkuð oft í samanburði við baðvenjur Kronthaleren en hann segist þvo sér einu sinni í mánuði.
Westwood hefur áður sagt að hún sé ekki vön því að fara í sturtu, hún þrífi bara líkamsparta sína og drífi sig út.
Westwood er mikill umhverfisverndarsinni, hún er grænmetisæta og hefur gagnrýnt hversu mikið vatn fari í það að framleiða kjöt. Það getur því verið að umhverfissjónarmið spili inn í hversu oft hún baðar sig.