Með fatastíl sem passar konungsfjölskyldunni

Bandaríska leikkonan Meghan Markle er við það að ganga inn í bresku konungsfjölskylduna. Fatastíll hennar er smekklegur og einfaldur og ólíklegt að Markle þurfi að gjörbreyta fatastíln sínum til þess að passa inn í hina fáguðu fjölskyldu. 

Díana prinsessa þótti mikil tískufyrirmynd og það þykir Katrín hertogaynja líka. Fatnaður Markle á því án efa eftir að vekja athygli. Konur í konungsfjölskyldunni taka yfirleitt ekki of mikla áhættu í fatavali og verður klassískur og fágaður fatnaður yfirleitt fyrir valinu. 

Markle er ekki með djarfan fatastíl þrátt fyrir að hún leyfi sér að sýna meira hold en verðandi svilkona hennar, Katrín hertogaynja. Hún þykir einnig með afslappaðri og oft og tíðum nútímalegri fatastíl en Katrín. Hún hefur til að mynda verið berleggja í stuttum kjólum og í stuttbuxum og klæðst flegnum kjólum. 

Hún er þó þekkt fyrir einfaldleika í klæðaburði, vönduð efni og klassísk snið. Hún ætti því að smellpassa inn í konungsfjölskylduna en gæti þurft að skilja rifnu gallabuxurnar eftir heima áður en hún fer í te til Betu ömmu.