Það þurfti ekkert minna en stórlið Inter til að fella Stjörnuna loks í frumraun sinni í Evrópudeildinni. Á ógleymanlegu kvöldi í sögu Garðabæjarliðsins sótti ítalska liðið 3:0-sigur í Laugardalinn fyrir seinni rimmuna á San Siro í næstu viku.
Galdrakarlarnir frá Mílanó sýndu fljótt að þeir hefðu lítinn áhuga á að ævintýri Stjörnumanna yrði eitthvað lengra. Þeir fóru sér reyndar að engu óðslega og sóttu ekki á mörgum mönnum gegn þéttri vörn Stjörnumanna, en í gegnum föst leikatriði sköpuðu þeir stórhættu þar sem fyrirliðinn Andrea Ranocchia fór fremstur í flokki og var Daníel Laxdal erfiður.
Stjarnan pakkaði auðvitað hreinlega í vörn, og ekki við öðru að búast, en eftir því sem leið á fyrri hálfleikinn náðu Garðbæingar að hrista af sér taugatitringsfjötrana sem óhjákvæmilega fylgja því að spila stærsta leik lífs síns. Liðið náði örfáum spilköflum og varðist þess á milli fimlega.
Sjá nánar í íþróttablaði Morgunblaðsins í dag.