Íslenska karlalandsliðið í knattspyrnu er á þessari stundu á æfingu í Astana-Arena, hinum glæsilega og yfirbyggða knattspyrnuleikvangi í höfuðborg Kasakstans, en þetta er lokaæfingin fyrr leik þjóðanna í undankeppni EM á morgun.
Allir leikmenn liðsins eru með á æfingunni og engin teljandi meiðsli í hópnum þannig að Lars Lagerbäck og Heimir Hallgrímsson landsliðsþjálfarar hafa úr öllum mannskapnum að velja.
Þeir sögðu á fréttamannafundi fyrir æfinguna að allar aðstæður væru hinar bestu í Astana og allt til fyrirmyndar hjá heimamönnum varðandi aðbúnað.
Íþróttafréttamaður mbl.is var á fyrsta hluta æfingarinnar sem var opin fjölmiðlum fyrstu 15 mínúturnar og þar var meðfylgjandi myndskeið tekið en þar má sjá Friðrik Ellert Jónsson sjúkraþjálfara stjórna upphitun landsliðsmannanna.