Tveir leikir fóru fram í Lengjubikarkeppni karla í knattspyrnu í kvöld. HK vann þá öruggan sigur á Þrótti í Egilshöllinni en Grindavík og Fjarðabyggð skyldu jöfn.
Guðmundur Atli Steinþórsson skoraði tvívegis í 3:0 sigri HK á Þrótti, en staðan var 1:0 í hálfleik. Árni Arnarson innsiglaði sigur Kópavogsbúa, sem eru nú í þriðja sæti síns riðils með tólf stig eftir sex leiki, og í harðri baráttu við Fylki, FH og Breiðablik um að komast í átta liða úrslitin, en Þróttur hefur sjö stig í fimmta sætinu.
Í Akraneshöllinni gerðu svo Grindavík og Fjarðabyggð 1:1 jafntefli. Andri Þór Magnússon kom Fjarðabyggð yfir en Jósef Kristinn Jósefsson jafnaði fyrir Grindvíkinga í uppbótartíma og þar við sat, en bæði lið hafa sjö stig í sínum riðli.