Eiður skákaði pabba sínum

Eiður Smári Guðjohnsen er þremur mánuðum eldri en Arnór Guðjohnsen, faðir hans, var þegar hann skoraði sitt síðasta landsliðsmark fyrir Íslands hönd.

Eiður gerði sitt 25. mark fyrir A-landslið Íslands í gær, í sínum 79. landsleik, þegar hann kom liðinu yfir eftir 20 mínútna leik gegn Kasakstan í undankeppni Evrópumótsins í knattspyrnu í Astana. Eiður er 36 ára og sex mánaða gamall og bætti með þessu eigið markamet fyrir landsliðið.

Arnór lék sinn 73. og síðasta landsleik á Laugardalsvellinum 11. október 1997, þá 36 ára og þriggja mánaða gamall. Arnór hélt uppá það með því að skora eitt marka Íslands í 4:0-sigri á Liechtenstein í undankeppni HM 1998. Það var fjórtánda mark Arnórs fyrir íslenska landsliðið.

Eiður kom inná fyrir föður sinn í sínum fyrsta landsleik, gegn Eistlandi í Tallinn 24. apríl 1996. Til stóð að þeir feðgar myndu spila saman með landsliðinu gegn Makedóníu í undankeppni HM tveimur mánuðum síðar.

Í millitíðinni fótbrotnaði Eiður illa í leik með 19 ára landsliði Íslands á Írlandi og var frá keppni í tvö ár. Þar með varð ekkert af því að hann og Arnór yrðu saman inni á vellinum í landsleik eins og útlit var fyrir.

• Blogga um frétt