Keflavík lagði Grindavík að velli í sannkölluðum Suðurnesjaslag í 1. deild kvenna í knattspyrnu á Nettóvellinum í Reykjanesbæ þar sem úrslitin réðust í lok uppbótartíma.
Þegar allt stefndi í jafntefli og þrjár mínútur voru komnar fram yfir venjulegan leiktíma skoraði Anita Lind Daníelsdóttir, leikmaður U17 ára landsliðs Íslands, sigurmark Keflavíkurliðsins, 1:0.
Eftir tvær umferðir í B-riðli eru Haukar og Keflavík með 6 stig, Afturelding, Grindavík, Fjölnir og Augnablik eru með 3 stig en Álftanes og Grótta eru án stiga.
Víkingur í Ólafsvík er á toppi A-riðils eftir auðveldan sigur gegn Hvíta riddaranum, 7:0, á Ólafsvíkurvelli í kvöld.
Víkingur Ó., ÍR og HK/Víkingur eru með 6 stig hvert, Þróttur R. 4, Skínandi 1 en Fram, KH og Hvíti riddarinn eru án stiga eftir tvær umferðir.