Króatíski framherjinn Hrvoje Tokic skoraði jöfnunarmark Víkings Ólafsvíkur í 1:1 jafntefli liðsins gegn Íslandsmeisturunum, FH, í sjöttu umferð Pepsi-deildar karla í knattspyrnu á Kaplakrikavelli í kvöld.
Tokic er afar þefvís á marktækifæri, en hann hefur verið verulega iðinn við kolann síðan hann kom til Ólafsvíkur í júlí síðasta sumar.
Tokic hefur skorað 18 mörk í síðustu 14 leikjum sem hann hefur leikið fyrir Víking Ólafsvík þar af sex mörk í Pepsi-deildinni í sumar sem er ansi vel af sér vikið.