ÍA sigraði ÍBV 2:0 þegar liðin mættust í 12. umferð Pepsi-deildar karla á Akranesvellinum í kvöld. Eyjamenn áttu fá svör við glæsilegri spilamennsku ÍA.
Fimmti sigur Skagamanna í röð og þeir eru nú komnir á hæla efstu liða deildarinnar með 19 stig. Eyjamenn síga hinsvegar enn nær fallsvæði deildarinnar en þeir eru með 14 stig og hafa aðeins fengið eitt stig í síðustu fimm leikjum.
Fyrsta korterið var jafnt milli liða. Garðar Gunnlaugsson braut ísinn á 17. mínútu með þvílíkum þrumufleyg utan teigs. Þetta var áttunda mark Garðars í fimm leikjum og hans ellefta í deildinni í sumar.
Eftir það hófst stórleikur Skagamanna. Þeir sóttu fast og brutu upp hverja sókn ÍBV á fætur annarri. Ármann Smári Björnsson var eins og klettur í vörninni og á 33. mínútu bætti hann við öðru marki ÍA þegar hann skallaði boltann inn eftir fyrirgjöf Jóns Vilhelms Ákasonar.
ÍBV kom aðeins betur spilandi inn í seinni hálfleikinn en náði ekki að skapa sér mörg góð færi. Ekki einu sinni eftir að Darren Lough hjá ÍA var ranglega sendur af velli á 74. mínútu.
Skagamenn vörðust vel eftir rauða spjaldið, héldu áfram að sækja og eru vel að sigrinum komnir.