Sóknarmaðurinn Eiður Smári Guðjohnsen er genginn til liðs við FC Pune City í Indlandi. Félagið greindi frá þessu á twitter nú fyrir stundu.
Eiður sagði skilið við norska úrvalsdeildarliðið Molde fyrr í mánuðinum og var í kjölfarið orðaður við ýmis lið í indversku úrvalsdeildinni. Átta lið leika í indversku deildinni, sem hefst í október og lýkur rétt fyrir jól.
Eiður Smári hefur víða komið við á sínum glæsilega ferli. Hann lék til að mynda með ensku liðunum Chelsea, Bolton og Tottenham, spænska stórliðinu Barcelona, AEK í Aþenu, belgísku liðunum Cercle Brugge og Club Brugge, Monaco í Frakklandi og með kínverska liðinu Shijiazhuang Ever Bright sem hann spilaði með áður en hann samdi við Molde í febrúar á þessu ári.
Punekars! Let's welcome Icelandic legend @Eidur22Official. #GudjohnsenToFCPC pic.twitter.com/DuAa0irHOq
— FC Pune City (@FCPuneCity) August 24, 2016