„Það var gaman að fá þessa tilnefningu,“ sagði Óttar Magnús Karlsson framherji Víkings Reykjavíkur, sem fékk viðurkenningu frá KSÍ sem efnilegasti leikmaður Pepsi-deildarinnar að loknum leik Víkinga og Þróttara á Þróttarvellinum en það voru leikmenn deildarinnar sem tóku þátt í kosningunni.
Frétt mbl.is: Óttar efnilegastur í deildinni
Óttar Magnús sagðist heilt vera ánægður með tímabilið sitt. „Ég var ekki fastur í byrjunarliðinu til að byrja með en síðan átti ég nokkrar góðar innkomur. Ég komst inn í liðið og náði að skora nokkur mörk, sem var fínt, þannig að ég get verið sáttur við tímabilið."
Spurður út í næsta tímabil sagðist Óttar vera samningsbundinn út leiktíðina 2018. „Eins og staðan er í dag verð ég áfram hjá Víkingum nema eitthvað annað komi upp."