„Það svíður mjög mikið að tapa fótboltaleik á tveimur hornspyrnum. Þetta á ekki að gerast,“ sagði Halldór Smári Sigurðsson, varnarmaður Víkings R., eftir 2:3 tap gegn Breiðabliki á heimavelli í dag.
„Maður þarf ekki að geta neitt í fótbolta til að geta varist föstum leikatriðum. Þetta er bara einhver aumingjaskapur. Einbeitingarleysi og bull,“ bætti Halldór við aðspurður hvað hafi farið úrskeiðis í leiknum.
Spilamennska Víkinga hefur verið ágæt það sem af er móti en illa hefur gengið að safna stigum.
„Mér finnst við koma vel inn í þessa leiki, við erum að spila vel úti á vellinum en það er bara vandamál að við erum að leka inn of mörgum mörkum. Það er það sem er að tapa leikjunum.“
Milos Milojevic hætti sem þjálfari liðsins á föstudaginn. Voru einhverjar áherslubreytingar gerðar fyrir þennan leik?
„Nei, engar sérstakar. Bara að reyna að fá meiri gleði inn í þetta. Þetta var búið að vera smá þungt, við vorum að reyna að fá meiri léttleika inn í þetta og þjöppuðum okkur vel saman fyrir þennan leik. En allt kom fyrir ekki og við verðum að reyna aftur næst. We go again,“ sagði Halldór Smári að lokum.