„Þetta góða gengi heldur áfram jafn lengi og við berjumst hver fyrir annan. Mér fannst við stjórna leiknum eftir erfiða byrjun fyrstu 15-20 mínúturnar í leiknum og sigurinn því verðskuldaður,“ sagði Andri Rúnar Bjarnason í samtali við mbl.is eftir 2:1-sigur liðsins gegn KA í Pepsi-deild karla í knattspyrnu í kvöld.
Andri Rúnar brenndi af vítaspyrnu í fyrri hálfleik, en var hvergi smeykur þegar Grindavík fékk aðra vítaspyrnu þegar um það bil tíu mínútur voru eftir af leiknum. Andri Rúnar skoraði sitt tíunda deildarmark í sumar og sá til þess að Grindavík situr á toppi deildarinnar með 21 stig.
„Ég var pirraður í smástund eftir að hafa klúðrað fyrra vítinu, en svo pældi ég ekkert meira í því. Ég var bara staðráðinn í því að bæta fyrir það og skora seinna í leiknum. Það tókst og ég er mjög ánægður með það. Nú er ég búinn að ná mínu persónulega markmiði og mun setja mér annað í kjölfarið. Liðið mun síðan setja sér annað markmið fyrir seinni umferðina held ég,“ sagði Andri Rúnar um markaskorun sína og gott gengi Grindavíkur það sem af er sumri.