„Ég hef verið lengi í þessum bransa og aldrei í lífinu hef ég upplifað neitt þessu líkt,“ sagði Logi Ólafsson þjálfari Víkinga eftir 4:2 tap fyrir FH þegar liðin mættust í Víkinni í dag þegar leikið var í 19. umferð efstu deildar karla í fótbolta, Pepsi-deildinni.
„Við hefðum getað verið komnir með fjögur mörk áður en FH skorar sitt fyrsta mark og vorum þá frábærir. Við erum í góðum málum og höfum möguleika á að bæta við mörkum þegar FH skorar svo fyrsta mark sitt en svo kemur þriggja mínútna kafli, sem er í raun óútskýranlegt hrun á liði okkar og fá á sig þrjú mörk á þremur mínútum er alveg ótrúlegt. Við höfum yfirleitt fengið á okkur mörk í upphafi leikjanna en það gerðist ekki í dag og okkur tókst að skora tvö mörk á undan mótherjanum svo maður ól þá von í brjósti að það væri eitthvað sem við gætum fylgt eftir en svo koma þessi mörk FH. Yfirleitt þegar við höfum fengið á okkur mörk í upphafi, þá höfum við byrjað en nú koðnuðu menn niður og skiptu algerlega um stíl.“
Hvað segir þjálfarinn um stöðu Víkinga í deildinni? „Það var leiðinlegt að horfa uppá þetta og gerir að verkum að við hefðum getað komið okkur nokkuð þægilega fyrir í deildinni með sigri eða stigi en það tókst ekki og virkilega dapurt að horfa á þetta. Það þarf ekki snjallan reiknimeistara til að sjá að ef við vinnum leiki og liðin sem eru í samkeppni við okkur gera það, er eðlilegt að við gætum sogast í botnbaráttuna. Þetta erfitt.“
„Ég get voða lítið sagt um þennan leik,“ sagði Halldór Smári Sigurðsson varnarjaxl Víkinga eftir leikinn. „Við erum auðvitað fyrst og fremst svekktir, það á ekki að vera hægt að fá á sig þrjú mörk á þremur mínútum og svona mörk. Okkur leið vel til að byrja með og skorum tvö mörk en þegar við fáum fyrsta markið á okkur þá hreinlega koðnum við niður með stressi og einhverju, sem ég varla útskýrt.“
Víkingar eru í 8. sæti deildarinnar og allt getur gerst segir varnarjaxlinn. „Það er stutt í botnbaráttuna en það þarf líka á átta sig á því að það er líka stutt í efri hlutann. Það er stutt í næsta leiki og ekkert annað í stöðunni en að bæta fyrir þetta í dag.“