Knattspyrnumaðurinn Kolbeinn Sigþórsson leikmaður franska liðsins Nantes stefnir á endurkomu í febrúar en hann hefur verið frá keppni í marga mánuði vegna hnémeiðsla. Ef allt gengur að óskum gæti hann snúið til baka í íslenska landsliðið og spilað með því á HM næsta sumar.
Frá þessu er greint á Vísi.is í dag en þar kemur fram að Kolbeinn sé í endurhæfingu í Katar og sé byrjaður að æfa með boltann að sögn Andra Sigþórssonar bróður Kolbeins.
Kolbeinn gekkst undir aðgerð á hné í sumar en hún skilaði ekki tilætluðum árangri. Um tíma var óttast að ferill Kolbeins væri á enda en hann hefur ekki spilað fótboltaleik síðan í ágúst 2016, skömmu eftir að hafa leikið lykilhlutverk í að koma íslenska landsliðinu alla leið í 8 liða úrslit Evrópumótsins í Frakklandi. Síðan þá hefur hann verið lánaður til Galatasaray í Tyrklandi, en spilaði þar ekki leik vegna meiðsla.
Heimir Hallgrímsson landsliðsþjálfari sagði á fréttamannafundi í byrjun síðasta mánaðar þegar hann var spurður út í Kolbein;
Hann er að fara af stað og það er opið pláss fyrir hann eins og alla aðra. Það verður spennandi að sjá hvernig hann kemur til baka eftir löng og erfið meiðsli. En hann á sinn möguleika eins og allir aðrir. Hann finnur ekki til þegar hann hleypur eftir því sem við best vitum og vonandi kemst hann aftur á skrið,“ sagði Heimir.