„Ég er mjög þreyttur“
Setja bókamerki
Portúgalinn Cristiano Ronaldo þarf að hvíla lúin bein áður hann hefur leik á Evrópumótinu í knattspyrnu í sumar. Portúgal mætir Íslandi í fyrsta leik beggja liða á mótinu, 14. júní.
Ronaldo skoraði úr síðustu vítaspyrnunni í vítaspyrnukeppni þegar Real Madrid sigraði Atlético Madrid í úrslitaleik Meistaradeildar Evrópu á laugardaginn. Aðspurður sagði Ronaldo, sem glímdi við meiðsli í vikunni fyrir úrslitaleikinn, að nú tæki við nokkurra daga hvíld:
„Núna er rétti tíminn til að slaka á og njóta augnabliksins. Síðan hef ég nokkra daga til að undirbúa mig þannig að ég verði klár í slaginn í sumar,“ sagði Ronaldo.
„Ég er mjög þreyttur. Ég er búinn að leika meira en fjögur þúsund mínútur á tímabilinu og lék mest allra í liðinu í vetur. Ég elska að spila fyrir Real Madrid og vil halda áfram og gera betur,“ bætti Ronaldo við.
