Tíu leikmenn úr Evrópumeistaraliði Spánverja voru teknir í lyfjapróf af UEFA í morgun en Spánverjar eru að búa sig undir leikinn gegn Ítölum í 16-liða úrslitunum á EM í Frakklandi.
Menn frá lyfjaeftirliti UEFA heimsóttu hótel spænska landsliðsins í morgun og kölluðu tíu leikmenn í lyfjapróf en þeir hafa ekki verið nafngreindir.
Blóð- og þvagsýni voru tekin af leikmönnunum en ekkert óeðlilegt fannst í þeim að því er segir í yfirlýsingu frá spænska knattspyrnusambandinu.
Spánn og Ítalía mætast í París í 16-liða úrslitunum á mánudaginn.