Endurkomusigur hjá Frökkum
Setja bókamerki
Frakkland er komið áfram í 8-liða úrslit Evrópumótsins í knattspyrnu eftir 2:1 sigur á Írlandi en leikurinn fór fram í Lyon. Frakkland mætir Englandi eða Íslandi í 8-liða úrslitum.
Hlutirnir byrjuðu ekki vel fyrir Frakka. Paul Pogba braut af sér innan teigs er hann hljóp aftan í Shane Long sem féll til jarðar. Vítaspyrna var dæmd og skoraði Robbie Brady af miklu öryggi með því að setja boltann í stöng og inn.
Frakkar voru mun meira með boltann í fyrri hálfleik en samt voru það Írarnir sem voru að skapa sér ágætis færi. Liðið var nálægt því að bæta við öðru marki um miðjan fyrri hálfleikinn en Hugo Lloris varði þá meistaralega í horn.
Frakkar gerðu sóknarsinnaða skiptingu í hálfleik. N'Golo Kante kom af velli og inn kom Kingsley Coman.
Eftir nokkrar tilraunir kom jöfnunarmarkið hjá Frökkum. Antoine Griezmann skoraði þá með skalla eftir fyrirgjöf frá Bacary Sagna og aðeins þremur mínútum síðar var hann búinn að koma liðinu yfir. Þá kom langur bolti fram, Olivier Giroud lagði hann fyrir Griezmann með hausnum á sér og Griezmann gat ekki annað en skorað.
Fimm mínútum síðar var Griezmann kominn einn gegn markverði írska liðsins en Shane Duffy ákvað að tækla hann áður en hann kæmist í færið. Duffy fékk rautt spjald og Frakkar aukaspyrnu á hættulegum stað en ekkert varð úr spyrnunni.
Frakkar voru nálægt því að bæta við fleiri mörkum. Andre-Pierre Gignac átti nokkur ákjósanleg færi, meðal annars eitt þeirra sem fór í þverslá. Griezmann fékk svo dauðafæri í uppbótartíma en tókst þó ekki að fullkomna þrennu sína.
Lokatölur því 2:1 fyrir Frakkland sem er komið í 8-liða úrslit. Liðið mætir Englandi eða Íslandi en það ræðst á morgun.
Adil Rami og N'Golo Kante, leikmenn Frakklands, missa af 8-liða úrslitum þar sem þeir taka út leikbann.
Leik lokið. Frakkland fer með sigur af hólmi. Gestgjafarnir eru komnir í 8-liða úrslit og er ljóst að liðið mun mæta Englandi eða Íslandi þar.
90. GRIEZMANN Í DAUÐAFÆRI!! Írarnir voru hættir og Frakkar fóru í sókn. Griezmann fékk boltann inn fyrir og þurfti bara að renna boltanum framhjá Randolph í markinu en hann sá þó við honum.
86. GIGNAC AFTUR!!! Það kom fyrirgjöf frá vinstri og Gignac rétt potaði í boltann en hann fór rétt framhjá markinu. Hann er heldur betur að koma sér í góð færi.
77. GIGNAC!!! Frábært skot frá honum sem fer í þverslá. Frakkar nálægt því að bæta við þriðja markinu. Það liggur í loftinu.
66. RAUTT SPJALD!!! Shane Duffy er rekinn af velli með beint rautt spjald. Hann hamraði Griezmann niður sem var að sleppa í gegn. Aukaspyrna rétt fyrir utan teig.
61. MAAAAAAARK!!! Frakkland 2:1 Írland. GRIEZMANN AÐ SKORA!!! Olivier Giroud teiknaði þetta upp. Það kom langur bolti á kollinn á Giroud. Hann kom boltanum fyrir hlaupaleiðina hjá Griezmann sem gat ekki annað en skorað. Frakkar komnir með forystu.
60. PAYET!! Skot fyrir utan teig en rétt yfir markið. Frakkar ætla sér að klára þetta á nokkrum mínútum.
58. MAAAAAAARK!!!! Frakkland 1:1 Írland. Antoine GRIEZMANN!! Bacary Sagna með fyrirgjöf frá hægri beint á hausinn á Griezmann sem stangaði knöttinn í netið. Þetta var alltaf að fara að gerast!
55. MATUIDI MEÐ SKOT!! Fast skot fyrir utan teig en Randolph ver í horn.
52. LLORIS!!! Írarnir keyrðu í skyndisókn, boltinn barst á vinstri vænginn. Þar kom fyrirgjöf sem Lloris komst í. Frábærlega vel lesið hjá Lloris. Shane Long var mættur til að klára færið en Lloris sá til þess að það myndi ekki gerast.
49. KOSCIELNY!!! Frakkar hársbreidd frá því að jafna metin. Það kom aukaspyrna inn í teiginn sem var flikkað áfram á Koscielny sem fór í flugskallann en hann hæfði ekki markið.
46. Síðari hálfleikur er hafinn.
Hálfleikur.
45. Frakkar sækja og sækja. Dmitri Payet fékk 2-3 færi þarna inn í teignum en Írar voru líklega með helminginn af liðinu fyrir framan hann. Vel gert hjá Írum.
44. Adil Rami fær gult spjald fyrir brot og er kominn í leikbann ef Frakkar fara áfram. N'Golo Kante er líka í kominn í leikbann fyrir gult spjald sem hann fékk fyrr í leiknum.
42. DAUÐAFÆRI!! Írarnir fá aukaspyrnu á góðum stað. Það kemur hættulegur bolti fyrir markið og Shane Duffy skallar hann en boltinn fór rétt framhjá.
24. Pogba lætur vaða úr aukaspyrnu en það er varið. Hef tilfinningu fyrir því að við fáum annað mark fljótlega.
22. Frakkar herja á markið. Írar áttu að vísu frábær færi en Hugo Lloris varði meistaralega framhjá markinu. Annars hefur þetta verið eign Frakka.
8. Griezmann!! Paul Pogba með skemmtilega takta á vinstri vængnum. Hann sendi boltann fyrir markið en skalli Griezmann fór yfir markið.
2. MAAAAAAAAARK!!! Frakkland 0:1 Írland. Robbie Brady skorar í stöng og inn. Þvílíkt öryggi! Skellur fyrir Frakka.
1. VÍTI!!! Paul Pogba brýtur á Shane Long og það er dæmd vítaspyrna.
1. Leikurinn er hafinn.
0. Hjá Frökkum eru fjórar breytingar en þeir stilltu ekki upp sínu sterkasta liði gegn Sviss í lokaleik riðlakeppninnar. N'Golo Kanté, Dimitri Payet, Olivier Giroud og Bailse Matuidi koma aftur inn í byrjunarliðið en Moussa Sissoko, Kingsley Coman, André-Pierre Gignac og Yohan Cabaye fara á bekkinn.
0. Byrjunarliðin eru klár og hægt er að sjá þau hér að neðan. Lið Íra er það sama og vann Ítalíu í lokaleik liðsins í riðlakeppninni.
Frakkland: Lloris, Evra, Rami, Kanté, Griezmann, Payet, Giroud, Matuidi, Pogba, Sagna, Koscielny.
Írland: Randolph, Coleman, Duffy, Keogh, Ward, Brady, McClean, Hendrick, McCarthy, Murphy, Long.
