Portúgal komst í gærkvöldi áfram í átta liða úrslit Evrópumótsins í Frakklandi eftir sigur á Króatíu í framlengdum leik í Lens. Sigurinn fleytti þjóðinni í sögubækurnar.
Ricardo Quaresma skoraði sigurmarkið í framlengingu, en með sigrinum settu Portúgalar met á EM. Þeir eru nú eina þjóðin sem hefur komist áfram í átta liða úrslit á öllum Evrópumótum frá því að átta liða úrslitin voru kynnt til sögunnar á EM í Englandi árið 1996.
Portúgal mætir Póllandi, sem sló Sviss út í vítaspyrnukeppni, í átta liða úrslitum í Marseille á fimmtudag.