Nýkjörinn forseti Íslands, Guðni Th. Jóhannesson, verður á meðal íslenskra stuðningsmanna þegar Ísland mætir Frakklandi í 8-liða úrslitum á Evrópumótinu í knattspyrnu á sunnudag.
Hann var sem kunnugt er einnig í stúkunni þegar Ísland sigraði England, 2:1, í 16-liða úrslitunum í Nice á mánudag. Þar hittust núverandi forseti, Ólafur Ragnar Grímsson, og sá nýkjörni, Guðni.
Guðni og eiginkona hans, Eliza Reid, voru í landsliðstreyju en Ólafur Ragnar og eiginkona hans, Dorrit Moussaieff, voru í hefðbundnum klæðnaði.
Sjálfur hefur Guðni sagt að hann ætli aftur að klæðast landsliðstreyjunni í París á sunnudag og að hann ætli að vera á meðal íslenskra stuðningsmanna:
„Af hverju ætti ég að fara inn í VIP-herbergi og fá mér kampavín þegar ég get gert það hvar sem er í heiminum?“ er haft eftir Guðna á vef BBC.