Liverpool vann nauman sigur á Hearts, 1:0, í fyrri leik liðanna í umspili um sæti í riðlakeppni Evrópudeildar UEFA í knattspyrnu sem fram fór í Edinborg í Skotlandi í kvöld.
Sigurmarkið var sjálfsmark sem Andy Webster, leikmaður Hearts, gerði á 78. mínútu. Martin Kelly sendi fyrir mark Skotanna frá hægri, Fabio Borini missti af boltanum sem fór í Webster og þaðan í netið. Borini hafði áður farið illa með góð færi í leiknum.
Liverpool hvíldi nokkra lykilmenn og m.a. voru Steven Gerrard og Luis Suárez ekki í hópnum.
Liðin mætast aftur á Anfield eftir viku.
Lið Liverpool: Reina - Kelly, Carragher, Agger, Robinson (Downing 62.) - Henderson, Spearing (Allen 67.), Adam - Sterling, Borini (Morgan 90.), Shelvey.