Iago Aspas, fyrrverandi samherji Luis Suárez hjá Liverpool, segir að farið sé með Suárez eins og morðingja en ekki knattspyrnumann í kjölfar bannsins sem hann fékk fyrir að bíta Ítalann Giorgio Chiellini á HM í Brasilíu.
„Þeir [FIFA] koma fram við Luis eins og morðingja en ekki knattspyrnumann. Það að leyfa honum ekki að vera kynntur [sem leikmaður Barcelona], eða æfa og koma inn á völlinn er of mikið,“ sagði Aspas sem gekk illa að festa sig í sessi hjá Liverpool á síðustu leiktíð og náði ekki að skora nema eitt mark en leikmaðurinn hefur nú verið lánaður til Sevilla á Spáni.