Van Gaal lét setja upp myndavélakerfi á æfingasvæðinu

Þegar leikmenn Manchester United æfa á æfingasvæði sínu í Carrington er nú hver einasta hreyfing þeirra tekin upp á myndband svo knattspyrnustjórinn Louis van Gaal geti greint sem ítarlegast hvað sé vel gert og hvað megi betur fara.

Komið hefur verið upp háskerpumyndavélakerfi á æfingasvæðinu að ósk Hollendingsins sem virðist ýmsu vilja breyta. Hann hefur einnig breytt því hvenær matmálstímar eru og skipt ferköntuðum borðum í matsalnum út fyrir hringlaga til að fá leikmenn til að tala meira saman. Hann fer jafnframt fram á að leikmenn tali saman á ensku.

Ekki lengur nóg að vinna leiki

„Þetta er orðið mikið nákvæmara á æfingasvæðinu. Það er búið að eyða þúsundum [punda] í svæðið og strákarnir hafa séð HD-myndavélar í kringum völlinn. Núna getur hann [van Gaal] fylgst með öllu sem við gerum á vellinum. Ég held að mörg lið noti þetta en við förum mjög nákvæmlega í þetta,“ sagði Jonny Evans, miðvörður United.

„Hann segir kannski við okkur að við ættum að vera fimm metrum lengra til hægri, og við sjáum núna hvað er að gerast á vellinum. Þetta er nýtt fyrir okkur öllum, áður fyrr var nóg að vinna leiki og þá voru allir sáttir,“ sagði Evans.

„David Moyes notaði myndbönd mikið svo við kynntumst því svolítið á síðasta ári. Núna skoðum við hlutina af meiri nákvæmni. Þannig vill hann hafa þetta. Núna skiptir allt máli, hvort sem það er hvaða fötum maður klæðist eða á hvaða tímum dagsins maður nærist. Hann er fljótur að hrósa manni þegar maður gerir vel en líka fljótur að láta vita ef eitthvað klikkar,“ sagði Evans um stjórann sinn.

• Blogga um frétt