Dzeko ekki með gegn Southampton

Manuel Pellegrini, knattspyrnustjóri Manchester City, staðfesti í dag að framherjinn Edin Dzeko yrði ekki orðinn leikfær í tæka tíð fyrir stórleik helgarinnar í ensku úrvalsdeildinni, þegar City heimsækir Southampton á sunnudaginn.

Á meiðslalistanum með Bosníumanninum eru sem fyrr þeir David Silva og Aleksandar Kolarov. „Allir aðrir eru heilir og tilbúnir. Það eru engin vandamál hjá David Silva, hann er á góðum batavegi," sagði Pellegrini og hrósaði liði Southampton sem er í 2. sæti, tveimur stigum fyrir ofan City.

„Þeir eru með gott lið og mjög góða leikmenn, og spila mjög vel. Staða þeirra kemur mér alls ekki á óvart. Ronald Koeman missti fjóra eða fimm leikmenn en liðið er samt sterkt og hann á hrós skilið fyrir það. Þetta verður erfiður leikur," sagði Pellegrini og kvaðst ánægður með baráttuhug sinna manna sem hafa knúið fram sigra í erfiðum leikjum síðustu daga.

„Við getum ekki kvartað yfir liðsandanum. Við vorum undir gegn Swansea og svöruðum tvisvar, og  gerðum það sama  gegn Bayern," sagði Pellegrini.

• Blogga um frétt