Liverpool er fullkomið fyrir Sterling

Raheem Sterling skartaði nýrri hárgreiðslu gegn Bournemouth og Gerrard grínaðist …
Raheem Sterling skartaði nýrri hárgreiðslu gegn Bournemouth og Gerrard grínaðist með að hún hefði gert gæfumuninn. AFP

Steven Gerrard fyrirliði Liverpool hvetur liðsfélaga sinn Raheem Sterling til að halda kyrru fyrir hjá félaginu og halda áfram á sömu braut.

Sterling er með samning við Liverpool sem gildir til 2017 en hefur hafnað tilboði félagsins um nýjan samning. Hann skoraði tvö mörk gegn Bournemouth í deildabikarnum í gærkvöld.

„Ég vona að hann geri nýjan samning við félagið vegna þess að ég tel að þetta félag sé fullkomið fyrir hann, í það minnsta næstu árin,“ sagði Gerrard við Telegraph.

„Hann mun spila hérna flestar vikur og stuðningsmennirnir elska hann. Hann getur þróast hérna og orðið leikmaður í allra fremstu röð. Þess vegna vona ég að fólkið í kringum hann gefi honum rétt ráð því hann ætti að halda kyrru fyrir hérna,“ sagði Gerrard, sem líkir Sterling við framherja sem fóru á kostum í búningi Liverpool.

„Þegar maður lítur upp þá er hann alltaf að gefa manni möguleika með hlaupunum sínum, og á því hef ég þrifist allan minn feril með menn á borð við Fernando Torres og Michael Owen. Það jafnast ekkert á við það þegar maður, sem miðjumaður, lítur upp og sér hröð hlaup inn fyrir vörnina. Ég sá það oft gerast gegn Bournemouth [í deildabikarnum í gærkvöld] og vonandi heldur það áfram því þetta teygir á andstæðingnum og opnar tækifæri,“ sagði Gerrard.

mbl.is
Fleira áhugavert
Fleira áhugavert