Arsene Wenger, knattspyrnustjóri Arsenal, býst við erfiðum leik þegar hans menn taka á móti Newcastle í ensku úrvalsdeildinni í knattspyrnu á morgun. Arsenal er í efsta sæti deildarinnar en Newcastle situr í 18. sæti.
Þrátt fyrir að Newcastle hafi einungis unnið fjóra af 19 leikjum sínum segir Wenger að það megi ekki vanmeta gestina úr norðrinu. „Byrjun þeirra á tímabilinu var strembin og þá skortir sjálfstraust. Þeir hafa leikið betur á útvelli en heimavelli, sem er eðlilegt undir slíkum kringumstæðum,“ sagði Wenger.
„Leikmannahópur Newcastle er góður og þeir hafa góða leikmenn í öllum stöðum. Í framlínunni eru Cissé, Mitrovic og Pérez. Á miðjunni eru þeir með Sissoko og Wijnaldum en það eru klókir leikmenn. Það er hættulegt að mæta Newcastle,“ bætti Wenger við.
Leikur liðanna hefst á morgun klukkan 15.00 og verður lýst í beinni textalýsingu á mbl.is.