Jürgen Klopp og Sam Allardyce, knattspyrnustjórar Liverpool og Sunderland, hafa sent hvor öðrum skeyti síðustu daga.
Allardyce gagnrýndi Klopp fyrir að kvarta yfir meiðslum í sínum hópi og sagði að ástæðan fyrir þeim væri einföld. Þjóðverjinn væri of harður við sína leikmenn, þeir væru útkeyrðir og þessvegna meiddust þeir.
Klopp sagði hinsvegar á fréttamannafundi í morgun: „Ég er ánægður með Sam og að svona reyndur knattspyrnustjóri skuli gefa sér tíma til að velta fyrir sér vandamálum Liverpool!"
Liverpool mætir Exeter á útivelli í 3. umferð ensku bikarkeppninnar annað kvöld. Klopp staðfesti að hann væri með engan heilan miðvörð í þeim leik því Kolo Touré væri ekki leikfær, frekar en þeir Dejan Lovren, Martin Skrtel og Mamadou Sakho.
Klopp sagði jafnframt að Philippe Coutinho yrði ekki leikfær fyrr en í febrúar og hans tognun aftan í læri væri verri en hjá Lovren, en þeir fóru báðir af velli í fyrri hálfleik gegn Stoke í fyrrakvöld.