Ítalskir fjölmiðlar fullyrða að enska knattspyrnufélagið Liverpool hafi þegar samið um að kaupa brasilíska framherjann Alexandre Pato, fyrrverandi leikmann AC Milan, af Corinthians fyrir 11 milljón evrur, sem jafngildir rúmlega 8 milljónum punda.
Pato, sem er 26 ára gamall, þótti með efnilegustu leikmönnum heims og kom 17 ára gamall til AC Milan árið 2007. Hann var þar í fimm ár og skoraði 51 mark í 117 leikjum í A-deildinni. Pato lenti síðan í þrálátum meiðslum, lék síðast með AC Milan í nóvember 2012 og var seldur til Corinthians í heimalandi sínu fyirr 15 milljón evrur í janúar 2013.
Hann lék eitt tímabil með Corinthians en hefur verið í láni hjá Sao Paulo undanfarin tvö ár. Samtals hefur Pato skorað 28 mörk í 89 deildaleikjum á þessum þremur árum í heimalandi sínu.
Pato hefur spilað 27 landsleiki fyrir Brasilíu og skorað í þeim 10 mörk en hefur ekki leikið með landsliðinu frá 2013.