„Þetta er mín besta stund á ferlinum og ég gæti ekki verið stoltari af því að vera hluti af þessu liði," sagði Wes Morgan, fyrirliði Leicester City, við BBC í kvöld eftir að ljóst varð að lið hans var orðið enskur meistari í knattspyrnu í fyrsta skipti.
Leikmenn Leicester mættu heim til framherjans Jamie Vardy og fylgdust þar með sjónvarpsútsendingu frá leik Chelsea og Tottenham. Jafnteflið þar, 2:2, gerði út um vonir Tottenham um að ná Leicester að stigum.
„Allir lögðu gífurlega hart að sér til að þá þessu takmarki. Enginn hafði trú á að við gætum þetta en hér erum við - enskir meistarar og það verðskuldað," sagði Morgan.
„Ég hef aldrei vitað annan eins liðsanda og er í þessum hópi. Við erum eins og bræður. Fólk sá það síðasta vetur þegar allir reiknuðu með því að við myndum falla en við náðum að koma öllum á óvart. Þetta tímabil hefur haldið áfram á sömu braut. Við byggðum ofan á þetta en ég held að enginn hafi dreymt um að við færum alla leið.
Ég get ekki beðið eftir laugardeginum og að fá að handleika bikarinn," sagði Wes Morgan.