Ranieri vill fá Benteke

Claudio Ranieri, hinn ítalski knattspyrnustjóri Englandsmeistara Leicester City, vill fá belgíska framherjann Christian Benteke til sín frá Liverpool í sumar, ef marka má frétt La Gazzetta dello Sport á Ítalíu í dag.

Blaðið segir að Ranieri sé þegar búinn að stilla upp sínum óskalista varðandi kaup á leikmönnum í sumar og þar sé Benteke annar tveggja sem hann leggi mesta áherslu á að fá.

Benteke hefur ekki verið inni í myndinni hjá Jürgen Klopp seinni hluta vetrar og nokkuð ljóst að hann er á förum frá Liverpool eftir að hafa lent fyrir aftan bæði Daniel Sturridge og Divock Origi í baráttunni um framherjastöðuna.

Benteke er 25 ára gamall og skoraði 49 mörk í 101 leik fyrir Aston Villa á þremur árum í úrvalsdeildinni áður en Liverpool keypti hann í sumar. Hann hefur skorað 9 mörk í 37 leikjum fyrir Liverpool og 7 mörk í 25 landsleikjum fyrir Belgíu.

• Blogga um frétt