UEFA hefur sektað Liverpool í annað skipti í þessari viku, að þessu sinni fyrir flugeldasýningu sem stuðningsmenn félagsins héldu í leyfisleysi á meðan leikur liðsins gegn Borussia Dortmund í átta liða úrslitum Evrópudeildarinnar stóð yfir.
Sektin fyrir flugeldasýninguna hljóðar upp á rúma eina og hálfa milljón íslenskra króna, en fyrr í vikunni fékk Liverpool rúmlega fimm og hálfa milljón íslenskra króna í sekt fyrir óviðeigandi söngva stuðningsmanna liðsins í leikjunum gegn Manchester United í 16 liða úrslitum keppninnar.
Þá er slæm hegðun stuðningsmanna Liverpool í úrslitaleik liðsins gegn Sevilla sem fram fór í Basel í síðustu viku einnig til skoðunar hjá UEFA. Þar brutust út átök milli stuðningsmanna Liverpool og Sevilla og stuðningsmenn félaganna köstuðu lauslegum hlutum í hvorir í aðra.
Forráðamenn Liverpool kunna þessum svörtu sauðum í stuðningsmannahópi félagsins líklega litlar þakkir fyrir slæma hegðun þeirra undanfarið.