Verður sá þriðji dýrasti í sögu Liverpool

Sadio Mane er á leið til Liverpool.
Sadio Mane er á leið til Liverpool. AFP

Liverpool hefur komist að samkomulagi við Southampton um kaupverðið á Sadio Mane, en kaupverðið er sagt vera heilar 30 milljónir punda. Hann fer í læknisskoðun í dag áður en kaupin ganga í gegn.

Mane er frá Senegal og kom til Southampton fyrir tveimur árum. Á þeim tíma hefur hann skorað 21 mark í 67 leikjum, meðal annars tvívegis gegn Liverpool í vetur þegar Southampton fór með 3:2 sigur af hólmi.

Hinn 24 ára gamli Mane yrði þar með þriðji dýrasti leikmaðurinn í sögu Liverpool. Aðeins þeir Andy Carroll, sem keyptur var á 35 milljónir punda, og Christian Benteke, sem keyptur var á 32,5 milljónir punda, eru dýrari.

mbl.is
Fleira áhugavert
Fleira áhugavert