Landsliðsmaðurinn Jóhann Berg kom við sögu í 3:1-sigri Burnley gegn Rangers í vináttuleik liðanna í dag. Þetta er hans fyrsti leikur fyrir enska úrvalsdeildarliðið síðan hann var keyptur til félagsins fyrir 2,5 milljónir punda um miðjan júlí. Jóhann kom inn á í hálfleik í stað Scotts Arfields.
Jóhann samdi við Burnley til þriggja ára en hann kom til liðsins frá Charlton þar sem hann hefur leikið undanfarin þrjú tímabil í ensku B-deildinni. Á síðasta tímabili átti hann flestar stoðsendingar í B-deildinni þrátt fyrir afleitt tímabil Charlton, sem féll niður um deild.
Fyrsti leikur Burnley í úrvalsdeildinni verður gegn Gylfa Sigurðssyni og félögum í Swansea þann 13. ágúst.